نيل أيوريش
اشتقت ليك يا نيل
واشتقت ليك يا غيوم
لى وهج العيون والأبتسام
والضحكة ديك همس الكلام
لى مرحبا وقولت سلام
...,,,,, وإشتقت ليك يا نيل ,,,,,,
لى خضرة جريف الحاجة والأحلام
للموجة والضفة و الهدام
لبنية لفحت ثوبها والجردل
ونادت تعدل ثوبها والهندام
هيا الوردة يا بنوت أرح قوام
وللساهي ومطنش نسانا تمام
..,,,,وإشتقت ليك يا نيل ...,,,,
للسيالة وأبو مجلي وأبو صرة وسمر الليل
وللقيزان وخيرانها ولبنايا إنهدت أطرافها
للأسطورة للقصة تاريخها
شيوخها مرزوقابها ساكنيها
.,,,,إشتقت ليك يا نيل ,,,,,
لحرازة وسط الطندب والخريم
ولوقاية فوق الراس لزوم الفزعة والآلآم
إشتقت لى صبحا عاقب الليل
يصابحك وجيه نادي متبسم
يقولك صباح الخير ماك ماشي لى قدام ؟؟؟؟؟؟
جيب لى معاك نص كيلو وأعزلو تمام
وهناك قدام خليط أصوات ....
أدينا نص كيلو ....ربع كيلو ... ما ديرو كلو عضام
وبين اللخمة والجوطة يصيح زولا قديم زعال
ما صايحنا وإطناطينا وأبينا نطول !!!!!!!!
ليك ناسات ..... ما تشوفنا في عزيل ؟؟؟
خلاص مشي يا ود البليل ؟؟؟
ما تفوت داير شنو ؟؟؟؟ ..هام تعال ....
نص كيلو من الدوش ..ووفي الكيل .....
ياخوى الدوش وين باقي وين الدوش ...؟؟..
كمان جيب خميساتك دين مافيش
جنيت آآآزول ماديلك حصحاص ديل ما قروش !!!!!
يشيل أغراضو ويتوكل وتاني تجوط ....
وتاني المشهد يتكرر ويقيفوا طويل
تلم الناس وتتفرق بطيب خاطر وأنس جميل
ديل أهلي شبيهم وين ..مافي مثيل
شوقي الكثير ليهم وليك يا نيل ......
وأشتاق ليك يا نوارة الحلة
وأرحل ليك يا مرفأ ....أحتاج ليك يا نسمة
أفتش ليك في الضلمة تنوري دربي بالسمة
وتسكني في الفؤاد رسمـــــــــــــة
تظلك من عيوني رموش
مع إنك ظلي والغيمة وفي جناحي كنتي الريش
وفي جواى حرفك من زمن منقوش
حياتي إنت أهواك وأشتاق ليك وراجع ليك يا أبريش .....
وبرجع ليك يا أبريش .....,,,,,....
وإشتقت ليك يا نيل ...,,,,,..,..,